Dated Aizawl the 1st September, 2022 :

Vawiin khan Department hotute leh sorkar lam atanga kan hotu lian te phalna leh remruatpuina zarah Fire & Emergency Services, Mizoram chuan an din champha kum 50 na lawmna hun Director Pu C. Lalzahngoa kaihhruaina hnuaiah Fire & Emergency Services Headquarters ah hman a ni a, he hunah hian Pu Lalchamliana, Hon’ble Home Minister khuallian ni in, Pu H. Lalengmawia IAS, Commissioner & Secretary to the Govt. of Mizoram leh Pu Devesh Chandra Srivastva IPS, DGP, Mizoram te khual zahawm anni.

 He hun hi Fire & Emergency Services a Director lo ni tawh te bakah sawmbik mi engemawzat ten an telpui a, programme zangkhai leh hlimawm tak hman a nih bakah zaithiam sawmbik Lalenkawli Pautu in kalkhawm te zai a awiin boruak hlimawm tak hman a ni.  

1972, March thla khan Assam Fire Service a thawk thenkhat chu Mizoram a Fire Service bul tan turin an lo chhuak a, mumal taka Fire Service function erawh chu September ni 1, 1972 niin, hemi ni hi ‘Fire Service Raising Day’ atana hman chhoh zel a ni ta a ni.

Hun a lo kal zel a, Mizoram Fire & Emergency Services Department chu  kum 50 - na lawm thei turin Pathian zarah a lo ding puitling ve thei ta a ni. He kum 50 - na lawmna denchhen a department hmalakna leh lawmna kalpui dan tlangpui chu :

1.    Kum 50 - na  champha lawmna denchhen hian souvenir siam a ni a, he souvenir - ah hian department hmalakna leh hnathawh hrang hrang te tarlan tel niin, thlalak eng emaw zat tarlan a ni bawk.

2.    Mizoram chhunga Fire Station hrang hrang 14- te chuan department kum 50 tlin lawmna pakhat atan  mahni station awmna veng/khua theuh ah faina leh thianghlimna kawng pakhat atan vantlang hmuna zunin leh kawngpui dung then fai hnatlang neih a ni. He hun hi ni 13 07.2022 khan hlawhtling taka hman a ni.

3.    Ni 27. 07.2022 khan a mamawhtu te hman turin Aizawl Civil hospital, Blood Bank tan thisen unit 30 pek a ni.

4.    Station hrang hranga thawktu  te bakah hian Headquarters, F&ES office, Aizawl a officer leh staff thenkhat te chuan mipui te kan him zawk nan theih tawp chhuahin kangmei chungchanga in zirtirna leh inhrilhhriatna hmun eng emaw zat ah neih a ni.

5.    He kum 50 - na champha hriatreng nan ‘Anniversary Plague’ granite hmanga siam a ni a, he plague hi Fire Station 14 - ah te tar vek a ni tawh.

6.    Kum 50 - na champha lawmna kawng pakhat atan, heng building hrang hrang: Government office buildings, commercial buildings, private buildings, heritage buildings, hospitals and dispensaries, educational institutions leh bank hmun ah te ‘Fire Safety Audit/ Inspection’ neih a ni.

7.    Mipuiten kangmei leh chhiatrupna lo thlen palha Fire Station biakpawhna number 101 kan hriat vek theih nan video clip tawi siam a ni bawk.